Gawe Cangkriman, Tugas Proyek Kelas 6

    

    Bocah-bocah kelas 6 ing dina iki ana tugas proyek gawe tuladha cangkriman bebarengan karo kanca sakelompok. Cangkriman yaiku unen-unen utawa ukara kang kudu dibatang/bedhek. Cangkriman lumrahe kanggo gegojegan. Jinise cangriman iku ana papat yaitu cangkriman sing wujude wancahan (cekakan), cangkriman sing wujude pepindhan (irib-iriban), cangkriman sing wujude plesedan (blenderan), cangkriman sing sinawung ing tembang. 

   Bocah-bocah anggone garap kanthi tenanan lan gegojegan. Bocah-bocah katon padha sumringah amarga wis bisa gawe cangkriman, sanadyan wis padha rada kesel. Ing ngisor iki tugas proyek sing wis digawe bocah-bocah kanthi bebarengan karo kelompoke.

Kelompok 1 (Ardita, Ivan, Mirza, Bayu)

1) Cangkriman sing wujude wancahan (cekakan)

    Geblok mengin: gedang ceblok merga angin.

2) Cangkriman sing wujude pepindhan (irib-iriban)

    Ora bisa dicekel nanging bisa dirasakne : banyu.

3) Cangkriman sing wujude plesedan (blenderan)

    Bebek lima dikali loro dadine pira? : Pitu, amarga sing loro ning kali. 

4) Cangkriman sing sinawung ing tembang

    Bapak pucung mbendinane gawe lungguh

    Sabamu ing omah

    Wujudmu kotak persegi

    Si pucung digawe saka kayu nangka.

    Batangane : .......................................... (ayo wangsulana ing kolom komentar)

    

Kelompok 2 (Lian, Gilang, Aris, Ningrum)

1) Cangkriman sing wujude wancahan (cekakan)

    Lesbo donge : teles amba godhonge.

2) Cangkriman sing wujude pepindhan (irib-iriban)

    Bisa ndelok lan bisa madani wujude manungsa : pangilon (cermin).

3) Cangkriman sing wujude plesedan (blenderan)

    Wong menek krambil ketok apane : ketok bodhone.

4) Cangkriman sing sinawung ing tembang

    Bapak pucung ora akur karo banyu

    Kanggo nggoreng iwak

    Diwadahi njero plastik

    Si pucung bisa kanggo nggoreng panganan.

    Batangane : .......................................... (ayo wangsulana ing kolom komentar)

Kelompok 3 (Adit, Galih, Rasya, Silvia)

1) Cangkriman sing wujude wancahan (cekakan)

    Parang piga : opak urang nutupi sega.

2) Cangkriman sing wujude pepindhan (irib-iriban)

    Wernane pethak, awake cilik, bisa dipangan, nalika kepidhak nyebabake sikil jinjit : sega.

3) Cangkriman sing wujude plesedan (blenderan)

    Wong kena cilaka disyukuri : sing disyukuri slamete dudu cilakane.

4) Cangkriman sing sinawung ing tembang

    Bapak pucung wujudmu kayata buku

    Panggonmu ning kamar

    Isimu sandangan klambi

    Si pucung dhuwurmu meh kaya salawang

    Batangane : .......................................... (ayo wangsulana ing kolom komentar)

Kelompok 4 (Diandra, Neo, Rega, Armaz)

1) Cangkriman sing wujude wancahan (cekakan)

    Sukdus wanlah : esuk adus awan sekolah.

2) Cangkriman sing wujude pepindhan (irib-iriban)

    Kidang turut pang : woh pucung.

3) Cangkriman sing wujude plesedan (blenderan)

    Wong adol tahu diirisi : sing diirisi tahune dudu wonge

4) Cangkriman sing sinawung ing tembang

    Bapak pucung mung meneng ra bisa mlaku

    Panggonmu ing omah

    Saka kaca uga wesi

    Si pucung gawe panggon klambi lan suwal.

    Batangane : .......................................... (ayo wangsulana ing kolom komentar)

Kelompok 5 (Febry, Nugroho, Reno, Haya)

1) Cangkriman sing wujude wancahan (cekakan)

    Matesong : masak tempe gosong.

2) Cangkriman sing wujude pepindhan (irib-iriban)

    Jabane ijo jerone kuning : pelem.

3) Cangkriman sing wujude plesedan (blenderan)

    Sapi loro mripate pira ? : papat (yen maca loro "2" dudu loro "lara") 

4) Cangkriman sing sinawung ing tembang

    Bapak pucung sikil bunder cacah telu

    Panggonmu ing dalan

    Sopire ana ing mburi

    Si pucung bisa gawa janma lan barang.

    Batangane : .......................................... (ayo wangsulana ing kolom komentar)

Bocah-bocah sing arep mangsuli cangriman sing sinawung ing tembang, bisa nulis ing kolom komentar. Tuladha carane: cangkriman tembang kelompok 1, batangane gajah.